Þetta eru innanhússtrendin sem verða vinsæl í sumar

Svala Jónsdóttir innanhússarkitekt segir að með vorinu munum við halda áfram að sjá notkun á náttúrulegum og hráum efnum sem skapa hlýleika og ró í rýmum. Efni eins og leir, kalkmálning, terrazzo, ull og hör verði áfram vinsæl, enda veita þau heimilum hlýlegt og rólegt yfirbragð.

„Hugmyndafræðin á bakvið Slow Living hentar vel í þessu samhengi,“ bendir Svala á en sú hugmyndafræði snúist um meðvitaða og einfaldari nálgun þar sem gæði eru einnig sett í forgang fram yfir magn.

„Til að innleiða þetta á heimilið mæli ég með að prófa kalkmálningu á veggi,“ segir Svala, „velja borðplötur eða gólfefni úr endurunnum steini og nota náttúruleg efni eins og ull og hör í teppi, púða og rúmföt.“

Sjálfbærni og endurnýting

Svala segir að með aukinni umhverfisvitund sé sjálfbærni orðin lykilþáttur í innanhússhönnun. Fólk sé í auknum mæli að huga að fjárfesta í gæðavöru sem endist lengur, endurnýtingu húsgagna og vali á vistvænum efnum og það muni ekki draga úr því í vor. Þvert á móti verði sjálfbærni og endurnýting áberandi.

„Það er einfalt að tileinka sér þetta með því að gefa gömlum húsgögnum nýtt líf, til dæmis með því að mála þau, skipta um höldur eða endurnýja slitinn búnað,“ segir Svala. „Einnig er hægt að velja sjálfbær efni eins og endurunninn við og náttúrulega textíla, sem bæði eru umhverfisvænni og hafa þetta hlýlega útlit sem við virðumst leitast mikið í þessa dagana.“

Það er einfalt að tileinka sér þetta með því að gefa gömlum húsgögnum nýtt líf, til dæmis með því að mála þau, skipta um höldur eða endurnýja slitinn búnað.

Sniðugar snjalllausnir

Þá bendir Svala á að tæknin haldi áfram að breyta heimilislífinu og snjalllausnir verði sífellt algengari. „Fólk vill auka þægindi og spara orku með snjallstýrðum kerfum, sem gera daglegt líf einfaldara og skilvirkara,“ útskýrir hún og segir alls ekki flókið að innleiða slík kerfi á heimilið.

„Með snjallperum geturðu til dæmis stjórnað birtustigi og litum í gegnum síma eða raddstýringu til að skapa rétta stemningu fyrir hvert tilefni,“ nefnir Svala. Einnig sé hægt að fjárfesta í tækjum sem fylgjast með orkunotkun heimilisins og hjálpa til við að draga úr óþarfa rafmagnsnotkun. „Þetta er frábær leið til að sameina nýjustu tæknilausnir og sjálfbæra hugsun,“ segir hún og brosir.

Stella Birgisdóttir innanhússhönnuður er sammála því að náttúrulegar og hráar áferðir verði vinsælar með vorinu. „Ég held að hrá leirker verði áberandi, bæði innan og utandyra,“ nefnir Stella sem dæmi um trend og segir einn helsta kost þess hversu auðvelt sé að innleiða það á heimilið. Hrá leirker með afskornum blómum eða plöntum geri mikið fyrir einfalt rými og séu auk þess falleg allan ársins hring.

Ég held að hrá leirker verði áberandi, bæði innan og utandyra.

Rústik rauður ryður sér til rúms

Stella telur að rústik-rauður litur verði sömuleiðis áberandi með hækkandi sól. „Þetta er bæði hlýr og notalegur litur og það þarf alls ekki að vera flókið eða dýrt að taka hann inn á heimilið. Til dæmis má mála einn vegg rústik rauðan eða kaupa textíl, mottur, púða, dúka og veggteppi í þessum fallega lit.“

Lampar úr náttúrulegum efnivið

Lampar úr náttúrulegum efnivið er annað trend sem Stellur telur að verði vinsælt. „Sjálf held ég mikið upp á lampa,“ segir hún. „Fallegir lampar geta nefnilega virkað eins og listmunir. Og það er alveg ótrúlegt hvað einn lampi getur oft og tíðum haft mikil áhrif. Hann getur umbreytt heilu rými!“

Að mati Þórunnar Högna stjörnustílista á fólk eftir að leggja aukna áherslu á notagildi og þægindi. Nú sé til dæmis „inn“ að vera með spa, bendir hún á, eða sína útfærslu af spa heima hjá sér. Mörg séu komin með kaldan pott, nokkuð sem hafi reynst henni sjálfri vel, eða sánu til viðbótar við heita pottinn á heimilinu. En hægt sé að fara aðrar og einfaldari leiðir til að auka þægindi.

„Gerum heimilið notalegt, þægilegt, hlýlegt og kósí með fallegum náttúrulegum litum, efnivið og fallegum textíl,“ segir hún og bendir í því samhengi á að sniðugt geti verið að skipta út textíl, eins og púðum, teppum og handklæðum. „Til dæmis skipta um mynstur eða lit inni á baðherbergi.“

Það má alltaf skipta um mottur. Eða færa til lampa.

Jarðlitir og mildir tónar

Þá telur Þórunn Högna að stórir „djúsí“ sófar verði mjög áberandi, mynstraðar mottur og hörgardínur í náttúrulegum litum. Og talandi um liti þá segir hún að jarðlitir verði áfram vinsælir; brúnn og mildir grænir og bláir tónar. „Þetta eru litir sem hafa róandi og góð áhrif á okkur,“ bendir hún á.

Gólflampar verði líka enn sýnilegri í ár en þeim fylgi falleg og hlýleg lýsing.

Það má til dæmis breyta uppröðun á sófaborðinu - bækur á borði og í hillum koma að mínu mati alltaf fallega út.

Litlu hlutirnir skipta máli

Annars segist Þórunn Högna mæla með að fólk prófi að endurraða heima hjá sér, bæði færa til húsgögn og líka húsmuni. Það sé ótrúlegt hvað það geti gert mikið fyrir rými. „Það má til dæmis breyta uppröðun á sófaborðinu - bækur á borði og í hillum koma að mínu mati alltaf fallega út. Eða skipta um mottur. Færa til lampa.“ Með öðrum orðum þurfi ekki alltaf að kaupa allt nýtt til að gera heimilið notalegt og kósí. Oft sé líka bara alveg nóg að mála til að breyta til á heimilinu.