Persónuleg ráð frá reyndum innanhúss stílista

Við höfum öll komið inn á heimili þar sem sjarmi þeirra sem þar búa, skín í gegn. Og oftar en ekki er erfitt að setja fingur á það sem gefur þennan „fullkomna” blæ. Best er að treysta á okkur sjálf og láta hreinlega vaða þegar kemur að því að innrétta heimilið!

Fyrsta reglan er að hætta að hafa áhyggjur af öllum reglum og eigin sköpunarhæfileikum. Upplifðu heldur drauminn og gefðu hugmyndunum þínum lausan tauminn - því „reglurnar” eru blessunarlega meira á undanhaldi en hitt. Við sjáum til dæmis meira og meira af viðartegundum í bland, sem áður var á bannlista ef svo mætti segja. Eins sjáum við meira af litum og ólíkum áferðum í efnisvali - sem færa heimilinu þennan persónulega sjarma. Því ætti ekkert að stoppa okkur í að velja það sem heillar mest í kringum okkur.

Að vera á persónulegu nótunum heima fyrir getur verið allt frá því að leyfa uppáhaldsbókunum þínum að liggja frammi á borði eða gefa heimagerðum listaverkum pláss. Eins ljósmyndir frá skemmtilegum ferðalögum fjölskyldunnar, sem og opnar hillur er skarta erfðagripum eða öðru djásni sem gefa heimilinu sál. Enginn er með sama smekk eða stíl og þú - svo það er heima sem þú færð fullt leyfi til að vera á persónulegu nótunum.

Fallegur myndaveggur er ekki eitthvað sem þú gerir á einum degi – oft tekur tíma að finna réttu verkin. En hér eru nokkrar hugmyndir hvernig má raða upp myndaveggjum.

• Myndaveggur er auðveld leið til að ná fleiri litum inn á heimilið - veldu lit sem skapar heildar samræmi.
• Ekki hika við að blanda saman ljósmyndum, teikningum, grafík og póstkortum – til að ná þínum persónulega stíl á vegginn.
• Ef þú ert í vafa um hvernig best sé að hengja upp myndirnar er góð leið að hengja upp myndirnar þannig að rammarnir séu allir í beinni línu að ofan eða neðan. Byrjaðu á því að hengja upp stærstu myndina og byggðu restina upp út frá því.
• Fyrir þá sem kjósa afslappaðara flæði, þá má vel stilla römmunum á gólfið.
• Sækistu eftir ekta gallerí-stemningu, þá er ráð að raða römmum upp frá gólfi til lofts. Með því að hengja rammana hátt upp á vegginn, nærðu að undirstrika hæðina í rýminu ef hún er til staðar og leiktu þér með stærðir og liti.
• Nýr rammi getur mörgu breytt! Prófaðu að mála einn ramma og sjáðu hvernig stemningin breytist. Þú getur málað rammann í sama lit og myndin, eða búið til algjöra andstæðu.
• Ef um margar misstórar myndir er að ræða, þá er oft gott að halda sig við regluna að hafa 5-7 cm á milli rammanna.
• Veggir hjá stigum geta nýst vel sem myndaveggir. Hér getur þú búið til persónulegt myndasafn með myndum og teikningum eftir krakkana.
• Myndahilla er fullkomin ef þú vilt skipta reglulega um myndir og stilla upp á ýmsan máta. Þá getur þú leikið þér að vild.

Sófar og hægindastólar eru mublurnar sem eru hvað mest áberandi á heimilinu. Og ef það blundar í þér listræn týpa, þá væri jafnvel ráð að velja húsgögn sem eru litrík, djörf eða í sérstökum formum sem vekja athygli fyrir skúlptúrað yfirbragð.

- Það er vart hægt að tala um innanhúss reglur þegar kemur að einhverju sem einfaldlega er smekksatriði. Svo sleppum reglunum!

- Gætið þess að raða húsgögnum ekki of þétt saman. Það er ekki þægilegt fyrir neinn að þurfa að þröngva sér á milli sófans og borðsins til að komast á milli.

- Raðið smáhlutum og skrautmunum saman í grúppur í stað þess að dreifa þeim jafnt yfir t.d. skenk eða hillu. Það gefur ákveðið anddrými fyrir augað og léttara yfirbragð.

- Vertu þú sjálfur er kemur að því að innrétta heimilið - það mun alltaf verða besta útkoman.