Fortíðarþrá á jólum
Heimili & hönnun - 12. desember 2022
Um leið og jólin eru hátíð sem við njótum í líðandi núi þá eru þau líka hátíð minninganna. Við búum ekki öll svo vel að eiga þá muni sem amma og afi voru með í jólaboðunum og lita æskuminningarnar en margt ævintýralega fallegt er til sem minnir á gamlar stundir og draga fram ilm og anda jóla fortíðarinnar.
Dúkar í fallegum djúpum litum, gulum, grænum eða rauðum tónum leggja drög að stemningunni og dekka borðið með nostalgíu.
Árstíðabundin hátíðarlína frá Royal Copenhagen. Skreytt grenilengjum, rauðum slaufum, gullbjöllum og öðru skrauti sem minnir á gamla tíma. Fullkomið sparistell á jólunum og skemmtilegt að blanda með öðrum stellum.
Það er vel við hæfi að bera fram heimagerðar smákökur eða konfekt í þessum fallegu smákökuboxum frá Rosenthal sem minna á liðna tíð.
Það er vissulega ákveðin nostalgía sem fylgir glösum og könnum í stíl sjöunda og áttunda áratugarins. Margir ólust einmitt upp við að jólaölið væri borið fram í Ultima Thule-könnu.
Gamaldags kertastjakar njóta sín vel á jólunum með kertum í öllum regnbogans litum.
Georg Jensen framleiðir ár hvert jólaskraut í silfri og húðuðu gulli. Klassísk hönnun sem er sérstaklega hátíðleg og töfrar fram fortíðarljóma á veisluborðið.
Pappírsskraut var fyrirferðarmikið á síðustu öld og gefur jólunum ákveðinn fortíðarblæ í allri sinni dýrð.
Svo er það glansið og glitrið, næfurþunnt og viðkvæmt jólaskrautið sem við umgöngumst með virðingu og varkárni til að bróta ekki. Eiginlega ómótstæðilegt.
