Kolbrún Pálína: „Fyrir mér er þetta tjáningarform“

Hvernig myndir þú lýsa stílnum þínum?

„Stíllinn minn er lifandi, litríkur, kvenlegur með dassi af töffaraskap í bland. Ég elska sterka liti en þeir gera einfaldlega svo miklu meira fyrir okkur og svo er bara miklu skemmtilegra að klæðast þeim. Eins spila aukahlutir eins og skartgripir, fallegir treflar, húfur og hattar stórt hlutverk.“

Áttu þér tískufyrirmynd?

„Mín uppáhalds fyrirmynd þessa dagana er hin eina sanna og rúmlega hundrað ára Iris Apfel. Hún er svo frábært dæmi um það að aldurinn á aldrei að stoppa okkur í því að tjá okkur eins og okkur líður með fatnaði. Hún er sú allra óhræddasta við að blanda saman litum, formum og risa aukahlutum. Ég elska að fylgjast með henni og sjá hverju hún tekur upp á næst.“

En uppáhaldshönnuð?

„Ég fell án efa meira fyrir flíkum, litum og efnum heldur en hönnuðum. Mér finnst hinsvegar gaman að eignast einn og einn aukahlut frá stærri merkjunum eins og partý veski frá Karl Lagerfeld, trefil frá Gucci og svo framvegis.“

Hvaða íslenska hönnuð heldurðu upp á?

„Ég held ég ætli að nefna íslenska skartgripahönnuði því ég hef eignast einstaklega fallega skartgripi í gegnum tíðina eftir íslenska hönnuði á borð við Sign, Ólaf Stefánsson gullsmið, Siggu & Timo, Vera Design og fleiri.“

Hvað finnst þér vera ómissandi í fataskápnum?

„Blazer-jakkar í öllum litum hafa komið mér ansi langt í gegnum árin. Þá getur þú alltaf treyst á klassískan grunn en skellt yfir þig geggjuðum blazer fyrir allskonar tilefni. Þess utan er nauðsynlegt að eiga klassískar og fallegar gallabuxur. Svört dragt í fallegu sniði kemur sér einnig vel, hvít skyrta, fallegir skartgripir sem skreyta tilveruna, klassísk taska og geggjuð sólgleraugu. Eins finnst mér miklu máli skipta að líða vel heima og legg því upp úr því að eiga falleg heimaföt, silkináttföt og góðan slopp.“

Mig dreymir líka um perluskreytta hælaskó frá Custommade!

Hverju veltirðu helst fyrir þér þegar þú kaupir þér eitthvað nýtt?

„Með aldrinum virðist fylgja einhver aukin skynsemi svo í dag þá verð ég að viðurkenna að ég velti hlutunum lengur fyrir mér áður en ég kaupi þá, stundum gera tveir, þrír dagar það að verkum að rökhugsunin tekur yfir og mig vantar flíkina allt í einu ekki alveg jafn mikið og í fyrstu. Í dag kaupi ég mér einna helst föt fyrir sérstök tilefni og þegar mig raunverulega vantar eitthvað. Ég notaði Covid í að minnka allverulega í fataskápnum og vanda mig betur að velja inn í hann í dag, sem er alveg rosalega skemmtilegt verkefni.“

Hver eru nýjustu kaupin?

„Það mun vera dásamlega fallega grænn Samsøe Samsøe -silkikjóll frá Evu sem var keyptur fyrir nýársfögnuð en er sömuleiðis hugsaður fyrir fleiri tilefni á nýja árinu.“

En bestu kaupin?

„Gullfalleg kápa sem ég fann í Gyllta Kettinum í aðventunni með loðkraga. Elska að finna gripi sem enginn annar á og gera góða kaup í leiðinni.“

Áttu þér uppáhalds flík?

„Nei, alls ekki. Engin flík á mig og engir hlutir heldur. Ég á hins vegar nokkrar flíkur sem mér þykir vænt um fyrir þær sakir að þær láta mér líða vel. En kápur og skór skora oft hæst hjá mér þar sem það setur svona punktinn yfir i-ið. Ég hef einmitt eignast litríkar kápur í gegnum tíðina sem mér þykir afskaplega gaman að klæðast.“

Er eitthvað sem þú gætir aldrei hugsað þér að klæðast?

„Föt sem skorta efni á hinum ýmsum stöðum eins og mikið er um í dag heilla ekkert sérstaklega.“

Hefurðu alltaf verið svona flott til fara?

„Takk fyrir hrósið! Ég held ég hafi alltaf haft hugrekki til að vera bara klædd sem ég sjálf þó svo að vissulega hafi maður orðið fyrir alls konar áhrifum á yngri árum. Þegar maður velur klæðnað sem manni líður vel í þá geislar maður eðlilega meira en ella. Fyrir mér er þetta tjáningarform, rétt eins og ég elska að raða fallega á matarborðið eða gera fallegt heima. Klæðnaðurinn minn er bara partur af því hver ég er sem manneskja.“

Stærstu tískumistök sem þú hefur gert?

„Þau snúa helst að því þegar maður var að prófa sig áfram á yngri árum og mætti í himinháum hælum í jóla fjölskylduboð og óþægilega stuttum pilsum. Allt í þágu tískunnar en svo leið manni bara alls ekkert vel í aðstæðunum.“

Hvað hefur reynslan kennt þér?

„Að leggja á sig að finna hvaða snið henta manni, að þora að blanda saman litum, að velja bara fyrir sjálfan sig.“

Lumarðu á góðu tísku-trixi sem þú ert til í að deila?

„Að hvíla föt um stund og taka fram aftur getur verið eins og að eignast nýjar flíkur. Svo er gott að útbúa sérstakan sumarskáp og annan fyrir vetrarflíkur svo að skápurinn sé ekki alltaf yfirfullur af fatnaði. Gott skipulag og að hugsa vel um fötin sín getur líka sparað mikla peninga. Byrjaðu nýja árið á að skipuleggja fataskápinn, fjarlægja óþarfa, bóka bás í Extraloppunni, gera lista yfir flíkur sem að þig vantar og dreifðu kaupum á draumaflíkunum yfir árið og geymdu fyrir góð tilefni.“