Dior-dagar

Við tókum saman nokkrar af okkar uppáhaldssnyrtivörum frá Dior og spennandi nýjungar sem vert er að skoða.

Möst

Forever Skin Correct-hyljarinn frá Dior er einn sá allra besti hyljarinn í bransanum að okkar mati og verður alltaf að vera til í veskinu okkar. Kremaður, fullþekjandi og formúlan er fullkomin.

Forever Skin Glow er uppáhaldsfarðinn okkar frá Dior en hann gefur dásamlegan ljóma og milliþekju.

Ef þú ert að leita að hinu fullkomna nude glossi, þarftu ekki að leita lengra. Stellar Gloss í lit 640 J´adior er í hinum fullkomna nude-tóni, gerir varirnar extra djúsí og klístrast ekki. Svo skemma umbúðirnar ekki fyrir!

Hér má sjá glossinn á tveimur ólíkum húðtónum.

Augnskuggapalletturnar frá Dior eru á heimsmælikvarða og margir þekktustu förðunarfræðingar heims dásama silkimjúka formúluna. Hins vegar viljum við gefa stöku augnskuggunum smá ást en ef þú finnur lit sem þú fílar þarftu ekki mikið meira! Þessi gullfallegi litur er númer 570 Copper.

Rosy Glow kinnaliturinn frá Dior gefur öllum húðtónum fallegan, rómantískan lit á kinnarnar sem er svo heillandi.

Spennandi nýjungar

Lip Glow eru sívinsælir, litaðir varasalvar sem voru að koma í nýrri, öppdeitaðri formúlu en liturinn Rosewood er frábær „your lips but better“-litur og er fullkominn svona dagsdaglega.

Super Potent Eye Serum-augnkremið úr Capture Totale-línu Dior er spennandi nýjung en augnsvæðið er viðkvæmt og húðin þar sú þynnsta á andlitinu. Augnsvæðið er einnig fljótt að sýna þreytu, bauga og fínar línur. Dior lofar góðum árangri á stuttum tíma en við elskum að bera það á því kremið kemur út um kælandi stálenda sem dásamlegt er að rúlla í kringum augnsvæðið á morgnana.
Mynd: KristínSam.