Hvað er þess virði að kaupa á útsölu?
Tíska - 5. janúar 2022
Við viljum ekki kaupa „bara eitthvað" á útsölunum, heldur vanda valið vel og fjárfesta í klassík sem stenst tímans tönn, en á extra góðum díl. Hér er það sem vert er að skoða á útsölum, með augum tískublaðamanns.
XL Úlpa
Góðar og flottar yfirhafnir eru besta fjárfestingin, sérstaklega þegar kona á heima á eyju úti í miðju ballarhafi. Við mælum með "dún"úlpum eða vestum í yfirstærð eða vatteruðum númerum.
Hér má sjá smart vesti í yfirstærð eins og er svo vinsælt núna.
Veldu úlpu sem er með ýktum kraga, það gefur þér nokkur tískuprik.
Praktískustu kaupin eru í yfirhöfn í svörtu eða öðrum nútral lit.
Steldu stílnum
Hér er hægt að versla svipaðan stíl á útsölu í Smáralind.
Rykfrakki
Rykfrakkar eru skyldueign í fataskápinn. Hvort sem hann er paraður yfir ullarpeysu að hausti eða stuttermabol að vori, á rykfrakkinn alltaf vel við. Því er ekki úr vegi að leita einn slíkan uppi á útsölu. Í vor verða rykfrakkar áberandi eins og svo oft áður.
Rykfrakkar úr rúskinni eða leðri verða líka vinsælir með hækkandi sól og sækja innblástur í tísku áttunda áratugarins.
Þetta dress á jafn vel við í dag og fyrir 20- 40 árum síðan. Instant klassík!
Rykfrakki í karamellubrúnu er smart.
Prjónadress
Síðir prjónakjólar eru sérlega chic og gott er að fjárfesta í einum slíkum á útsölu.
Paraðu prjónakjól við pönkaraleg og trendí stígvél eða klassísk og kvenleg-allt eftir skapi og stíl.
Blazer
Ef þú rekst á góðan blazer á útsölu, veistu hvað þú átt að gera! Fáar flíkur í fataskápnum fá jafnmikla ást og blazerinn.
Elegansinn og lekkerheitin, almáttugur!
Stígvél
Þú munt alltaf nota stígvél, hvort sem þú aðhyllist kvenleg leðurstígvél eða eitthvað meira trendí. Um þessar mundir er hægt að gera ágætiskaup á smart skóm sem munu ganga með þér langan veg.
Beisik buxur
Vel sniðnar buxur eru gulls ígildi. Ef þú finnur góðar gallabuxur eða klassískar svartar á útsölu, skaltu hlaupa að afgreiðsluborðinu.
Buxurnar úr Selected hafa reynst okkur vel.
