Bjútífúl brúnir

Augabrúnirnar ramma augun inn og eru mikil andlitsprýði. Ýmsar vörur hafa komið á markað síðustu árin eftir að þær urðu heitasti „fylgihluturinn“. Augabrúnatískan hefur að sjálfsögðu þróast mikið og breyst síðustu áratugina. Í dag eru þykkar, náttúrulegar og „fluffy“ brúnir vinsælar og taka við af Instagram-brúnunum svokölluðu, sem eru ýktari og meira fylltar inn, í anda Kylie Jenner.

Best í brúnir

Brow Blade frá Urban Decay er með „tússpenna“ á öðrum endanum sem framkallar trúverðugar og hárfínar strokur. Á hinum endanum er örþunnur skrúfblýantur.

Augabrúnablýanturinn frá Sensai stendur alltaf fyrir sínu og hentar þeim sem fíla örlítið þykkari odd, svo er mikill kostur að hafa greiðu á öðrum endanum og hægt er að kaupa fyllingar í skrúfblýantinn.

Augabrúnagel er eitthvað sem okkur finnst að eigi að vera til í hverri einustu snyrtibuddu. Pump ‘N’ Brow-gelið frá Dior er í uppáhaldi hjá okkur til að lita hvert hár, til að gera meira úr brúnunum og halda þeim á sínum stað allan daginn. Það er í þurrara lagi og því auðvelt í notkun.

Ódýrari týpurnar

Ultra thin Brow Pen frá Gosh er ný uppgötvun en merkið kemur stöðugt á óvart og gefur þeim dýrari ekkert eftir.

Munum að augabrúnirnar mega vera systur en þurfa ekki að vera tvíburar!

Augabrúnatískan hefur tekið stakkaskiptum síðustu áratugi en á þriðja áratug síðustu aldar voru þær örþunnar eins og sjá má á leikkonunni Clara Bow. Strikaðar brúnir féllu aftur í kramið á tíunda áratugnum þegar leikkonur á borð við Pamelu Anderson sportuðu örmjóum og ofurplokkuðum brúnum. Þær okkar sem ólumst upp á tíunda áratugnum súpum margar hverjar ennþá seiðið af því en þá er gott að kunna að „feikaða“!