Aldamótatískan snýr aftur

Britney Spears og Justin Timberlake voru heitasta parið um aldamótin og þegar þau mættu á American Music Awards, í byrjun árs 2001, í gallafötum frá toppi til táar varð til eitt ógleymanlegasta tískuaugnablik poppsögunnar sem smitaðist heldur betur út í tískuheiminn. Því meira gallaefni, því betra!

Og viti menn, denim on denim er aftur komið á fullt! Gallaföt frá toppi til táar voru áberandi hjá stílstjörnunum í götutískunni á nýafstöðnum tískuvikum og sanna að þetta aldamótatrend á enn fullt erindi í fataskápinn.

Það áttu allir og amma þeirra að minnsta kosti einar cargobuxur í fataskápnum um aldamótin og ekki var verra ef þær voru í hermannamynstri. Nú hafa þessar vasaprýddu buxur enn á ný ratað í sviðsljósið og fengið fágaða uppfærslu í takt við tíðarandann. Nostalgíufílingurinn er þó enn á sínum stað!

Hver man ekki eftir þeim tíma þegar það þótti nánast nauðsynlegt að fjárfesta í nýjum „djammtopp“ fyrir hverja helgi? Helst glitrandi, með hlýrum eða beru baki, paraður við lágar gallabuxur, litríka hæla og pínulitla handtösku. Svo var glossinum skellt á, ilmvatnsskýið lá yfir öllu og haldið af stað á djammið með Destiny’s Child á hæsta styrk. Ahh, þessir dýrðlegu aldamótatímar! Og nú eru þessir nostalgísku djammtoppar enn á ný komnir í sviðsljósið, bæði hjá stílstjörnunum og á fataslánum í verslunum. Glimmer, blúndur, hlýrar og ber bök, aldamótin hafa sjaldan verið jafn móðins!

Skærir litir eru aftur að ryðja sér til rúms og óvæntar litasamsetningar minna óneitanlega á litagleði aldamótanna. Bleikur við rauðan, límónugrænn við fjólubláan og því djarfara, því betra! Nú er um að gera að sleppa fram af sér beislinu og leyfa litunum að leika lausum hala. Túrkísblár og skærbleikur voru óneitanlega stjörnurnar í kringum aldamótin og við erum farin að sjá meira af í dag en áður.

Hér má sjá svipmyndir af götutískunni á nýafstaðinni tískuviku í París, þar sem ýmislegt vakti ljúfar minningar um stílinn í kringum 2000. Það er greinilegt að aldamótatískan á enn fullt erindi í fataskápinn!