Götutískan í New York
Tíska - 16. febrúar 2022
Við fengum að vera fluga á vegg (eða ljósmyndari úti á götu) þegar tíska næsta hausts var kynnt á dögunum í borginni sem aldrei sefur. Hér er tískuskammtur dagsins!
Kögur og fjaðrir
Nú þegar flestir hafa fengið nóg af joggaranum eftir mikla heimaveru er eins og tískan springi út og allt það sem gleður augað fær að njóta sín á ný. Pils, jakkar og kjólar með kögri, fjöðrum eða úr tjulli eru áberandi á þeim sem vilja fagna tískunni.
Það var eitthvað mjög Sex in the City-legt við mómentið þegar stílstjarnan Leonie Hanne snéri sér í hringi á götum New York borgar á dögunum.
Bodycon
Aðsniðin bombudress fá sinn tíma í sviðsljósinu á ný og við erum svo til í það!
Fagrir fylgihlutir
Okkur finnst ekki síður gaman að spotta fylgihlutina í götutískunni. Stórir eyrnalokkar, áberandi hálsfestar og handtöskur í skærum litum gleðja tískuhjartað okkar.
Working girl
Mörg átfittin á tískuviku í New York myndu sóma sér vel í vinnunni. Við tökum niður punkta!
Steldu stílnum
Stórar vinnutöskur verða útum allt á komandi misserum. Splæstu í eina sem getur geymt tölvuna og allt hitt í leiðinni!
