Hvað verður í tísku í vor og sumar?

Það er ekki hægt að komast hjá því að tala um risastóra fílinn í herberginu. Aldamótatískan tröllríður öllum tískuheiminum, hvort sem okkur líkar það betur eða verr. Tískuhúsið Blumarine tók nostalgíuna alla leið, og þá meinum við ALLA leið með tilheyrandi lágum bootcut-buxum, fiðrildaskreytingum og meira að segja glimmeri um allan líkama fyrirsætnanna. Þær okkar sem upplifðu trendin á eigin skinni í fyrsta sinnið erum kannski ekki alveg tilbúnar að stæla Birgittu og Britney en þá getum við hugsanlega dýft tánni ofan í trendið í annað sinnið með litlum cardigan-peysum eða tösku í þessum anda, svona aðeins til að sýna lit.

Við höfum enn verið að sjá skæra liti vaxa í vinsældum og þá sérstaklega grænan og appelsínugulan en grænn tískuvarningur á Netinu hefur farið upp um 28%, appelsínugulur um 15% á meðan gulur og bleikur hefur vaxið um 5 prósentustig. Vinsældir græna litarins má að einhverju leyti rekja til tískuhússins ítalska Bottega Veneta sem hefur verið sérlega hrifið af grænum að undanförnu og töskur, skór og sólgleraugu í skærgrænum verið mikið í sviðsljósinu í gegnum samfélagsmiðlastjörnurnar. Með hækkandi sól munum við án efa sjá íslenskar konur leika sér meira með liti, eftir lengsta vetur í manna minnum.

Það er hugsanlega rökrétt framhald af inniveru síðustu tveggja ára. Við erum komin með nóg af inniskóm og strigaskóm eru skilaboðin! Partískór á sterum er það sem við sáum mest af á vor-og sumartískusýningarpöllunum.

Tískuhús á borð við Prada og Dior voru upptekin af nútímaútfærslum á gamaldagsskólastelpulúkki. Háskólapeysur, hvítar skyrtur, og pils og kjólar sem minna á skólabúning fá sinn tíma í sviðsljósinu. Tíkarspenarnir eru meira að segja komnir hringinn. Ekki dæma okkur þó við segjum pass við þeim!

Nú þegar við getum hætt að hylja á okkur nefið og munninn er komið að efri hluta andlitsins, ef tískuheimurinn fær einhverju ráðið. Sólgleraugu í yfirstærð eru sjóðheit sem Kim K. og aðdáendur Balenciaga geta staðfest.

Við virðumst ekki alveg vera búin að sleppa takinu á þægindaklæðaburði ef marka má vinsældir svokallaðra Co Ords eða samstæðusetta sem er eins og nafnið gefur til kynna einföld leið til að klæða sig á morgnana og við hvaða tilefni sem er. Ekkert ves!

Klassíski rykfrakkinn lítur dagsins ljós á hverju vori og þetta vor er engin undantekning. Ekki þykir verra ef hönnunin hefur einhvern X-faktor sem brýtur klassíska sniðið örlítið upp.

Saint Laurent og Stella McCartney voru meðal þeirra tískuhúsa sem sendu sjúklega smart og sexí samfestinga niður tískusýningarpallinn.

Nú þegar fólk er að mestu hætt að vinna heima er meiri not fyrir töskur sem rýma allt hafurtaskið. Stórar töskur eru inni!

Toppar, skyrtur, kjólar og samfestingar með skemmtilega snúnu hálsmáli er trend sem við höfum séð mikið af upp á síðkastið.

Þrátt fyrir að mínípilsið frá Prada hafi tröllriðið tískubransanum síðan það var sent niður sýningarpallinn má einnig sjá andstæðuna, maxi-pilsið ná fótfestu sem eitt stærsta trend vorsins. Við fögnum því enda töluvert klæðilegra tískutrend!