Svona klæðast skvísurnar í Köben
Tíska - 5. september 2025
Göturnar í Kaupmannahöfn eru eins og tískusýning þar sem stílstjörnurnar setja tóninn á tískuviku. Við elskum að fylgjast með hvernig „skandí“-skvísurnar blanda saman flíkum og fylgihlutum og veita innblástur í hverju skrefi. Hér eru nokkur áberandi trend sem við getum tekið með okkur inn í haustið.
Blöðrubuxur
Eitt nýjasta æðið þegar buxnatískan er annars vegar er svokallað blöðrusnið sem stór tískuhús á borð við Chloé og Alaïa hafa kynnt til sögunnar. Við munum sjá mikið af þeim á næstu misserum eins og glöggir gestir dönsku tískuvikunnar tóku eftir.
Blúndurbolir yfir buxur
Eitt stærsta trendið þessa dagana, sem allir og amma þeirra virðast fíla, er að „layera“ síða blúndutoppa yfir buxur og jafnvel blúndupils. Við höfum séð þetta trend koma og fara í gegnum tíðina en sjaldan jafn áberandi og árið 2025.
Doppur
Hvort sem okkur líkar það betur eða verr þá eru doppurnar komnar til að vera- í bili.
Hárskraut
Dönsku skvísurnar eru duglegar að nota hárfylgihluti á borð við stórar „scrunchies“ og klemmur í allskyns útfærslum. Hér er fínn innblástur ef þig vantar hugmyndir að hárgreiðslu.
Klútar
Klútar og slæður eru sérlega áberandi þessi misserin og gaman að sjá allskyns skemmtilegar útfærslur á þeim.
Leiktu þér að stílisera slæður í skemmtilegu mynstri! Hægt er að binda um mittið, höfuðið, í gegnum beltisgötin á rykfrakkanum eða utan um handfang töskunnar.
Skyggð seventís sólgleraugu
Sólgleraugu í anda áttunda áratugarins, þar sem ramminn er stór og í „aviator“ stíl og glerið er litað er það sem er vinsælast í dag.
Sexy Back
Bringing sexy back, söng Justin í denn og það er akkúrat það sem við sjáum í toppatískunni í dag. Nú fær bakið að njóta sín í kynþokkafullum, opnum toppum.
Sportí mittisjakkar
Sportí anorakkar, stuttir mittisjakkar með uppháum kraga og áreynslulaus, sportí stíll er það sem er mest áberandi þegar kemur að yfirhöfnunum þessa tíðina.
Fallega „layeraðar“ hálsfestar með góðum skilaboðum á götum Kaupmannahafnar.
