Þetta eru best klæddu karlar landsins
Á Íslandi er varla þverfótað fyrir körlum sem eru flottir í tauinu. En hverjir skyldu bera höfuð og herðar yfir aðra þegar kemur að fatavali? Ritstjórn HÉR ER fékk valinkunna álitsgjafa til að velja þá best klæddu.
Stjúri rakari
Margrét Erla Maack fjöllistadís segir rakarann í kjallaranum hjá Kormáki og Skildi hafa einstakan skógarhöggsmannastíl og hann hafi leiðbeint og innblásið mörgum að finna tískuljónið í sér. „Stjúri er í fötum sem eru klassísk, fara honum og hans líkama vel og sýnir vel að það besta og klassíska er alltaf ódýrast þegar upp er staðið. Svo er hann bara svo góður gaur!“
Bergur Ebbi Benediktsson, rithöndur og uppistandari
Bergur Ebbi er mjög óhræddur þegar kemur að fatavali og fer vanalega ótroðnar leiðir. Einfalt en oftast með góðu tvisti. Retró fílingur með trendí ívafi. Hann getur hæglega skorið sig úr fjöldanum með óhefðbundnum samsetningum; pleðurbuxur, litrík dúnúlpa, retró strigaskór eða bara flott, vel sniðin jakkaföt,“ segir Álfrún Pálsdóttir, kynningarstjóri Miðstöðvar hönnunar og arkitektúrs um fatastíl Bergs Ebba. Henni finnst Bergur Ebbi flottur í tauinu meðal annars af því hann nær að koma manni skemmtilega á óvart. „Og maður sér að fatavalið er útpælt en samt afslappað.“
Bergur Ebbi.
Högni Egilsson, tónlistarmaður
„Högni er alltaf eins og klipptur út úr tískublaði,“ segir Margrét Erla Maack um tónlistarmanninn Högna. „Tískan og stíllinn hans er einstakt listaverk og tjáning. Svo fær hann líka stig fyrir að kunna að vera með sítt hár. Ekkert hestehale-tagl-rugl. Maður sem fylgir sínum eigin tískustraumi.“
Högni Egilsson, tónlistarmaður.
„Högni hefur einstakan, persónulegan stíl og er greinilega ekki hræddur við neitt þegar kemur að klæðnaði. Hann er ekki að velta því fyrir sér hvað öðum finnst. Hann leyfir sér að klæða sig í öðruvísi og áberandi föt. Það gustar af honum og hann klæðist oft litum og er gjarnan í mjög áberandi skóm. Hann er framsækinn og tekur áhættur en treystir á eigið innsæi þegar kemur að fatavali. Hann hefur sterka tískuvitund, hefur gaman af því að vera Högni og er að þróa hugmyndina um sjálfan sig með fatnaði og tísku. Þannig skapar hann sér sérstöðu,“ segir Linda Björg Árnadóttir, doktorsnemi í félagsfræði tísku.
Linda bendir á að tíska sé samtal milli fólks og afleiðing borgarsamfélagsins. Því þéttara sem samfélagið er því meira máli skipti tíska. Samkeppni aukist milli fólks, um til dæmis störf og maka, og með því að nota vel „tækið tísku“ geti fólk hámarkað árangurinn. Auk þess eigi tíska tilveru sína undir áhorfendum. „Og það sést á klæðnaði Högna að hann er ekki bara að tala við okkur Íslendinga,“ segir hún, „heldur fólk í alþjóðlegu samhengi.“
Linda undirstrikar að tíska sé tungumál og líkt og önnur tungumál búi tíska meðal annars yfir setningum, málsgreinum og upphrópunar- og spurningamerkjum, eins og hugsuðurinn Bertrand Russel bendi á í bók sinni The Language of Fashion. Með hliðsjón af því sé gaman að velta fyrir sér hvaða skilaboðum fólk vilji koma á framfæri með klæðnaði sínum. „Það sem Högni er að segja með sinni tísku eða fatavali er framsækið, persónulegt, rómantískt og ljóðrænt,“ lýsir hún. „Og um leið er það „lifandi“ og í sífelldri þróun.“
- Linda Björg Árnadóttir, doktorsnemi í félagsfræði tísku.
Kormákur og Skjöldur
„Hér eru á ferðinni tvíeyki sem hafa breytt fatastíl karlpeningsins hér á landi. Fært okkar breskan eðalklæðnað og tweed. Þeir klæðast auðvitað mest fatnaði úr sinni verslun og úr eigin smiðju. Jakki, vesti og buxur í stíl, vel bónaðir skór og skyrta, þó það sé bara mánudagur. Óhræddir við notkun fylgihluta á borð við hatta og klúta,“ segir Álfrún Páldóttir, um Kormák Geirharðsson og Skjöld Sigurjónsson, eigendur Herrafataverslunar Kormáks & Skjaldar. Hún bætir við að henni finnist alltaf best þegar viðkomandi er trúr sínum stíl og sé ekki að elta trendin. Kormákur og Skjöldur eigi það sameiginlegt.
Biggi Veira
„Það væri óskandi að fleiri myndu fara að fordæmi Bigga og klæðast fötum sem dansa á hefðbundna kynjarófinu,“ segir Margrét Erla. „Alltaf klæddur eins og hann gæti hoppað upp á svið að „performa“, ávallt viðbúinn og ég kann að meta það.“
Biggi Veira.
Helgi Ómars
Álfrúnu finnst Helgi kannski ekki beint skera sig úr með áberandi hætti en hann nái að gera einfaldleikann spennandi, til dæmis með því að nota fylgihluti vel. Eins sé hann óhræddur að prufa sig áfram. „Hann kann að setja saman fallegar samsetningar á klæðnaði, og veitir manni oft innblástur. Enda tískan í dag algerlega óháð kyni.“
Stefán Svan
Borghildi finnst Stefán skera sig úr „á góðan hátt“. „Hann virðist einfaldlega hafa virkilega gaman að því að velja sér flottar flíkur en það er gert á mjög einlægan hátt. Hann er ekki að elta „trendin“ þannig lagað heldur hefur fundið sér sinn persónulega stíl sem virkar ótrúlega vel fyrir hans karakter.“
Hún segir Stefán óhræddan við að vera „í tísku“. „En eins og ég sagði þá gerir hann það á sínum forsendum,“ tekur hún fram, „og það kemur frá einlægum áhuga grunar mig. Hann veit hvaða föt virka fyrir sig, er óhræddur við að vera svolítill húmoristi stundum, klæðast sterkum litum af og til og svo er hann líka algjör snillingur í að sjá hvaða flíkur innihalda alvöru gæði.“
Viktor Már Pétursson fatahönnunarnemi
„Viktor er augljóslega húmoristi og nær hann að miðla því með góðum og skýrum hætti til umhverfisins með klæðnaði sínum. Hann hefur allt það frelsi sem er til, til þess að leika sér með tísku og prófa allt mögulegt. Það er ekkert „dresscode“ í Listaháskólanum, þar sem hann er fatahönnunarnemi. Útkoman er framsækin og frumlegur en umfram allt sannfærandi stíll,“ segir Linda Björg um fatastíl Viktor Más.
Hún bendir á að ef litið sé á klæðnað almennings í sögulegu samhengi þá hafi ýmsar breytingar í samfélögum, til dæmis byltingar, haft þau áhrif að fatastíllinn breyttist hratt án þess að það sé fyrirfram ákveðið. Það sé einfaldlega ekki hægt að innleiða samfélagslegar breytingar án breytinga á fatnaði. Það þurfi að vera mismunandi útlit og klæðnaður, svona „fyrir“ og „eftir“ breytinguna til þess að hún geti verið innleidd í viðkomandi samfélag. Þannig virki tískan; hún sé fyrst og fremst dæmi um framsækni nýrra hugmynda. Með hverjum nýjum listamanni komi nýtt útlit og ný tíska. Gamlar hugmyndir séu skildar eftir með því að skipta um föt. Linda segir því áhugavert að snúa dæminu við og spyrja hvort við getum breytt samfélaninu með nýrri tísku? Sjálf telur hún til dæmis tónlistarmanninn David Bowie hafa gert það með alteregói sínu Ziggy Stardust. Og ef einhver geti haft svipuð áhrif á Íslandi sé það Viktor Már.
„Viktor er í alls konar tilraunastarfssemi með sinn klæðnað og er sem dæmi óhræddur við að blanda saman mjög ólíkum hlutum með það að markmiði að þróa sína eigin sjálfsmynd og gera framsæknar tilraunir á sjálfum sér. Hann er gangandi rannsóknar- og þróunarverkefni í fatahönnun sem vonandi endar aldrei.“
- Linda Björg Árnadóttir, doktorsnemi í félagsfræði tísku.
Sverrir Norland, rithöfundur og gagnrýnandi í Kiljunni
„Sverri hef ég ekki séð á listum eins og þessum áður en mér þykir hann eiga heima í þessari upptalningu. Hann státar af stíl sem er ekki áberandi „tískulegur“ heldur fremur lítillátur en það er þó augljóst að hann vandar valið þegar kemur að fatnaði. Ég kann að minnsta kosti vel að meta chore jakkana, hlýlegu peysurnar, náttúruleg efnin og jarðlitina sem hann velur sér.“
Að mati Borghildar er Sverrir ekki týpan sem klæðist merkjavöru eða augljóslega nýjustu trendum. Hún segir að svo virðist sem hann hafi fundið sinn stíl í hlýlegum og þægilegum flíkum sem eru örlítið „hipsteralegar“ en „alls ekki of“. Smá franskur keimur sé á stílnum hans og ljósir lokkarnir fari vel við.
„Ég kann alltaf vel að meta þegar fólk hefur fundið sinn persónulega stíl og heldur sig við hann. Sverrir er kannski ekki endilega að pæla mikið í því dags daglega hvort hann er „móðins“ eða ekki,“ nefnir Borghildur,“ en það er líka stundum það sem er sjarmerandi við stíl fólks. Þegar hann verður til á afslappaðan hátt.“
- Borghildur Gunnarsdóttir fatahönnuður.
Sævar Markús, fatahönnuður og einn eiganda verslunarinnar Apotek Atelier
„Fyrir utan það að hanna ótrúlega fallegan fatnað er Sævar sjálfur alltaf svo óaðfinnanlega klæddur að unun er að fylgjast með. Hann hefur virkilega næmt auga fyrir gæða efnum og stíllinn hans er klassískur og einfaldur sem gerir að verkum að efnin og falleg snið fá að njóta sín. Ég veit ekki hvort það er rétt, og það skiptir engan veginn alltaf máli, en Sævari tekst að láta fötin sín líta út fyrir að hafa verið dýr, í jákvæðri merkingu orðsins,“ segir Borghildur Gunnarsdóttir um klæðaburð Sævars Markúsar fatahönnuðar.
Borghildur segir Sævar ekki skera sig úr vegna þess að hann sé svo áberandi heldur sé þarna mikill smekkmaður á ferð. Hann noti sjaldan skæra liti heldur velji ljúfa og hlýja klassíska tóna og klæðist gjarnan svörtu. Það sé samt ekki annað hægt en að taka eftir Sævari því hann sé svo sjarmerandi.
„Ég kann að meta þegar fólk hefur vit á að velja góð efni sem endast og klæðist flíkum sem augljóst er að það getur átt og klæðst í mörg ár. Og þó svo að stíll Sævars sé klassískur þá er hann samt mjög persónulegur, hentar honum afar vel enda er þarna “classy” gaur á ferðinni.“
- Borghildur Gunnarsdóttir fatahönnuður.
Baldur Stefánsson, framkvæmdastjóri fyrirtækjaráðgjafar hjá Kviku
Linda Björg segir að innan bankageirans megi finna ströngustu reglur um klæðaburð sem til eru á vinnumarkaðnum, bæði skrifaðar og óskrifaðar. Baldur hafi því ekki algert frelsi en noti mjög vel það svigrúm sem hann hefur og njóti þess augljóslega að leika sér með þessar stífu hugmyndir og reglur um klæðaburð.
„Baldur kemur með ferska strauma inn í fjármálaheiminn með fatavali sínu og fer gegn ríkjandi normi en er samt að skírskota í sögulegar hefðir innan fjármálaheimsins varðandi klæðnað. Þannig klæðist hann oft jakkafötum með vesti, en jakkafötin eru í litum, jafnvel köflótt og alltaf skemmtileg,“ tekur Linda sem dæmi.
Hún segir lítið mál að fara inn í merkjavöruverslun og kaupa eitthvað dýrt, hafi fólk efni á því á annað borð, en það sé bara „alltof of auðvelt“ og ekkert samasemmerki á milli þess að klæðast einhverju dýru og að vera flottur til fara. Auk þess sé ekkert varið í það þegar fólk noti klæðaburð aðeins til að miðla stöðu sinni eða fjárhag. Fatnaður eigi vera skemmtilegur og endurspegla persónleika hvers og eins.
„Baldur miðlar því að hann er skemmtilegur og skapandi og með sínum klæðnaði hefur hann skapað sinn eigin persónulega stíl sem er að vekja athygli og hefur áhrif á aðra innan fjármálaheimsins. Það má alveg láta sér detta í hug að ástæðan sé sú að Baldur kemur úr fjölskyldu listamanna, að hann sé einfaldlega með framsæknina og sköpunina „í blóðinu“ og hafi þar af leiðandi aðra sýn og sjálfsmynd en aðrir í faginu.“
- Linda Björg Árnadóttir, doktorsnemi í félagsfræði tísku.
